ئەمڕۆ شەممە ٥ی مانگی یونی ساڵی ٢٠١٠ سینەدۆم گەورەترین سینەمای شاری کۆڵن، لە مەیدانی میدیا پارک، بە پێچەوانەی هەر رۆژێکی ساڵ پڕ بوو لە کورد. هۆی ئەو قەرەباڵغییە لە هۆڵی ژمارە چوار، نیشاندانی فیلمێک بوو لە سەر یەک لە کارەساتەکانی کورد لە سەدەی بیست.

٧٢ ساڵ بەر لە ئێستا پاش لە سێدارەدانی شێخ رەزای دەرسیمی و قتڵ وعامی خەڵک، کۆمەڵێکی زۆر لە دانیشتووانی ناوچەی دەرسیم بە زۆری ئەرتەشی ترک، راگوێزران بۆ شوێنێکی دیکە.  پاش کووشتن و سەربەنیس کردنی دایک و باوکەکان، منداڵانی کورد ڕادەگوێزرێن. دەرهێنەرانی فیلمی کچانی وون بوو، نزهەت و کازم گویندۆغان بە شوین ئەو منداڵانەدا دەگەڕین و چەند کەسیان پەیدا دەکەن . فیلم لە سەر گێڕانەوەی بەسەرهاتی ئەو منداڵانە بە تایبەت دوو لە کچانی وون بوو ساخ بۆتەوە.

فیلمەکە جگە لە گێڕانەوە کارەساتەکە، کۆمەڵێک وێنەی ئەو سەردەمانە لە خۆی دەگرێ. سەرەتای فیلمەکەش بە چەند وێنە لەوانە وێنەی شێخ رەزا دەست پێدەکات و هاوکات لە ڕێگای وێژەرەوە باسی ئەو سەردەمە دەکرێ. پاشان فیلمەکە بە کردنەوەی گرێی پرێسکەیەکی بچکۆلانە دەست پێدەکات. نزهەت و کازم گویندۆغان بەم شێوەیە بەسەرهاتی ژیانی کچانی وون بوو لە زمانی دوو ژن وەک شاهیدی زیندوو و کەسانی نزیکیانەوە دەگێڕنەوە. فیلمەکە ڕەنگە لە لایەنی هونەریی و فیلم سازییەوە زۆر کەس ڕازی نەکات و زۆر بکەوێتە بەر ڕەخەنە، بەڵام لە لایەنی مێژوویی و سیاسی و ئینسانییەوە، کارێکی بە نرخە. نزهەت کە خۆی وەک کچە کوردێک لە دانشگاوە رەوانەی ژووری زیندانەکان کراوە، دوای هاتنە دەر لە زیندان لە ڕێگای رێکخراوی مافی مرۆڤەوە فێری فیلم سازی دەبێ و بە فیلمی کچانی وون بوو، یان دوو چەپکە قژ، پەردە لە سەر یەکێک لە جنایەتەکانی سەدەی بیست هەڵدەداتەوە ،کە دوای قڕکردنی ئەرمەنییەکان بە دەستی دەوڵەتی ترکیە، یەکیک لە کۆمەڵکوژییەکانی گەورە بووە کە بە سەر کوردەکان لە تورکیە هاتوە. نزهەت و کازم قڕکردنی دەرسیمییەکان بە دروست کردنی ئەو فیلمە دەهێنە ریزی کۆمەڵکوژییەکەی ئەرمەنییەکان، بەوەش سەند و بەڵگەنامەیەکی جیددی دەخەنە بەر چاوی مرۆڤی سەدەی بیست و یەک.

کورد لەو فیلمە و لە قسەکانی شاهیدانی هێشتا زیندووی ئەو کارەساتە ، دەتوانن کەڵک وەرگرن بۆ دادخواهی  خۆیان لە کۆمەڵگای ناونەتەوەیی. فیلمی کچانی وون بوو/دوو چەپکە قژ، بە کردنەوەی ئەو پرێسکانە کۆتایی پێدێت کە لە سەرەتای فیلمەکەدا دەیبینین، ئەوەش باشترین بەشی هەموو فیلمەکەیە، کە ناوی فیلمەکەش هەر لێرەوە وەرگیراوە. کچی یەکێک لەو دایکانە لە کاتی کردنەوەی پرێسکەکەدا، دوو چەپکە قژ نیشان دەدا. ئەوە ئەو تاڵە قژانەیە کە وەختی خۆی بە دەستی نیزامییەکانی ئاتاتورک هەڵپاچراوە و دایکەکە داویە بە کچەکەی  خۆی و داوای لێکردووە بیانپارێزێ. دوای تێپەڕبوونی حەفتاودووساڵ دوو چەپکە قژ داستانی دڵتەزێنی کچانی وونبووی ئێمە  ودایکیان دەگێڕێنەوە، کە چۆن ئەنفال کران. نەوەی ئەوژنانە ڕەنگە کەسانی وەک شیرین عەلەم هولی بن، کە ئیرادەیان ڕژێمی ئیسلامی لە ئێران بە چۆک دادێنێ، یان لەیلا زانا بێ کە بوونی بۆتە هۆی عاسی بوونی ڕژیمی تورکیا. دوو چەپکە قژ دەبێ ڕێخۆشکەربێت بۆ دروستکردنی دەیان فیلمی لەو چەشنە بۆ بە بەڵگەکرنی کارەساتەکانی وەک ئەنفال، حەڵەبجە و بێ سەروشوێن کردنی ٥٩ لاوی مەهابادی و دەیان کارەساتی وەک لە سێدارەدانی لاوانی سنە لە باڵەفڕخانەی سنە و…!

کۆڵن لایف

رۆژی شه‌ممه‌  پێنجی مانگی یونی سه‌عات 14 له‌ سینه‌ما سینه‌دۆم(Im Mediapark 1, 50670 Köln)  کۆڵن، فیلمی” کچانی له‌ بیرکراوی ده‌رسیم” بۆ یه‌که‌مجار نیشان ده‌درێ. ئه‌م فیلمه‌ باسی کچانی شاری ده‌رسیم له‌ باکووری کوردستان ده‌گێڕێته‌وه‌ که‌ چۆن به‌ر له‌ 70 ساڵ له‌ لایه‌ن سه‌ربازانی ترکه‌وه‌ ڕفێندراون و چۆن له‌ وڵاتی خۆیان دوور خراونه‌ته‌وه‌‌. له‌ کۆتایی نمایشی فیلمه‌که‌دا  سینه‌ماکاران Nezahat Gündoğan und Kazım Gündoğan باس له‌ چۆنیه‌تی سازکردنی فیلمه‌که‌ ده‌که‌ن و له‌ گفتوگۆی ڕاسته‌وخۆدا وڵامی پرسیاری به‌شداربووان ده‌ده‌نه‌وه‌.

رێکخه‌رانی ئه‌م به‌رنامه‌یه‌ بریتین له‌:

Veranstalter: Menschenrechtsverein Türkei / Deutschland (Tüday), Alevitische Gemeinde Deutschland,  Föderation der Dersim Gemeinden in Europa, mit Unterstützung des KulturForum TürkeiDeutschland

بۆ کڕینی کارت و دابین کردنی جێگا پێوه‌ندی به‌م ژماره‌ ته‌له‌فونه‌وه‌ بکه‌:

Kartenvorverkauf unter: 0221 / 94985620

کۆڵن لایف: ئه‌مڕۆ رۆژی شه‌ممه‌ 25ی گوڵان(15 مانگی مای 2010) شاری کۆڵن شاهدی خۆپیشاندانی کورد و ئێرانییه‌کان بوو، به‌ بۆنه‌ی له‌ سێداره‌دانی شیرین عه‌له‌م هولی، فه‌رهاد وه‌کیلی، فه‌رزاد که‌مانگه‌ر، عه‌لی حه‌یده‌ری و مه‌هدی ئیسلامیان.

خۆپیشاندان که‌ له‌ لایه‌ن هێزه‌کانی کورد و ئێرانییه‌وه‌ بانگه‌وازی بۆ کرابوو. سه‌عات 4ی پاش نیوه‌ڕۆ له‌ مه‌یدانی ئێبرت، ئێبرت پلاتس ده‌ستی پێکرد و پاش رێپێوان به‌ ناو شه‌قامه‌کانی شاردا، گه‌یشته‌ مه‌یدانی کلیسای دۆم. له‌وێ کۆمه‌ڵێک له‌ نوێنه‌رانی هێزه‌کانی کورد و ئێرانی و هه‌روه‌ها ئاڵمان سه‌باره‌ت به‌ له‌ سێداره‌دانی زیندانیانی سیاسی کورد وتاریان داو هه‌مه‌ لایه‌ن ئیدانه‌ی رژێمی ئیسلامی ئیرانیان کرد. له‌ درێژه‌ی رێپێوانه‌کدا به‌ زمانی فارسی و ئاڵمانی له‌ دژی حکومه‌تی کۆماری ئیسلامی ئێران دروشم درا. ئه‌وه‌ یه‌که‌م جار بوو کورده‌کان و باقی خه‌لکه‌کانی ئێران به‌ یه‌که‌وه‌ به‌شداری رێپێوانێکی وایان ده‌کرد. وێنه‌ و پلاکارت و ئاڵای هه‌موو لایه‌ک له‌ کورد و فارس و ئه‌وانی دی ده‌بیندرا، هه‌روه‌ها له‌ میتنگی به‌ر ده‌م کلیسای دۆم، به‌ زمانه‌کانی کوردی و فارسی و ترکی و ئاڵمانی ئاخافتن به‌ڕێوه‌ چوو. له‌ خۆپیشاندانه‌که‌دا کۆمه‌ڵێک له‌ کورده‌کانی باشوور و باکوریش به‌شدار بوون. نوێنه‌ری پارله‌مانی ئه‌یاله‌تی نۆردراین وێستفالن حه‌میده‌ ئیقبال یه‌کێک له‌ وتارده‌ران بوو که‌ له‌ لایه‌ن حزبی چه‌په‌کانی ئاڵمانه‌وه‌ ده‌دوا. خۆپیشاندان و کۆبوونه‌وه‌که‌ که‌ نزیک چوارسه‌عاتی خایاند، کاتژمێر 19 و 30 به‌ کاتی کۆڵن دووای پێهات. شایانی گووتنه‌ هه‌ر ئه‌مڕۆ له‌ شاری دۆسلدۆرف کورده‌کانی باکوور، رێپێوانێکی هاوچه‌شنیان به‌رپا کرد که‌ زیاتر له‌ 500 که‌س تێیدا به‌شدار بوون. به‌شدارانی رێپێوانه‌که‌ی کۆڵن به‌ 2000 که‌س مه‌زنده‌ ده‌کرا.

 حزبی دێموکرات مه‌ سیحی CDU زیاتر له‌ ده‌ له‌سه‌دی ده‌نگه‌کانی پێشووی خۆی له‌ ده‌ست داو توانی 34،5 له‌ سه‌د به‌ ده‌ست بهێنێ. سوسیال دێموکراته‌کان SPD له‌ 37،1 له‌ سه‌ده‌وه‌ دابه‌زینه‌ 34،5 له‌ سه‌د. سه‌وزه‌کان له‌ 6،2 له‌ سه‌ده‌وه‌ گه‌یشتنه‌ 12،1 له‌ سه‌د. لیبراله‌کان له‌ 6،2 له‌سه‌ده‌وه‌ گه‌یشتنه‌ 6،8 له‌ سه‌د. حزبی چه‌پ Die Linke که‌ پێشتر له‌ پارله‌ماندا نوێنه‌ریان نه‌بوو، له‌و هه‌ڵبژاردنه‌دا 5،6 له‌ سه‌دی هێناوه‌ته‌وه‌ و فراکسیونی خۆی ده‌بێت له‌ دۆسلدۆرف.

حزبی دێموکرات مه‌سیحی ده‌بنه‌ خاوه‌نی 67 کرسی، سوسیال دێموکرات 67 کورسی، لیبراله‌کان 12 کورسی، سه‌وزه‌کان 23 کورسی و چه‌په‌کان 11 کورسی.

 ئه‌وه‌ی ده‌وڵه‌ت له‌ لایه‌ن کێ و به‌ هاوکاری کام له‌ حزبه‌کان پێک دێت، جێگای مشت و مڕه‌. خه‌ڵک به‌ گشتی ده‌نگیان به‌ گۆڕان داوه‌ و زۆربه‌ی هه‌ر زۆری خه‌ڵک ده‌نگی به‌ باڵی چه‌په‌کان داوه‌. ئه‌گه‌ر به‌ پێی ده‌نگی زۆربه‌ی خه‌ڵک بێت ده‌بێ ده‌وڵه‌ت له‌ لایه‌ن سوسیال دێموکرات و سه‌وزه‌کانه‌وه‌ پێک بێت که‌ ئه‌و دوو حزبه‌ ده‌نگی ته‌واویان نییه‌ و نیازمه‌ندی ده‌نگی حزبی چه‌پ ده‌بن. ئه‌وه‌ی ئایا سوسیال دێموکراته‌کان له‌ باری فکری و سیاسییه‌وه‌ ڕازی به‌ هاوکاری له‌ گه‌ڵ ئه‌وان ده‌بن یان نا، پێوه‌ندی به‌ بۆچوونی حزبه‌که‌ به‌ گشتی هه‌یه‌. ئه‌وه‌ی سوسیال دێموکرات و سه‌وزه‌کان و لیبراڵ یه‌ک بگرن، له‌ واقعی سیاسی حزبی لیبرال ناچێ که‌ له‌ گه‌ڵ سه‌وزه‌کان ببێته‌ هاوپه‌یمان. سه‌رئه‌نجام ئایا سوسیال دێموکرات پشت له‌ ده‌نگی خه‌ڵک ده‌که‌ن و له‌ گه‌ڵ دێموکرات مه‌سیحی ده‌بنه‌ هاوپه‌یمان و ده‌وڵه‌ت پێک ده‌هێنن؟ ئه‌گه‌ر ئه‌و کاره‌ بکرێ ئه‌وه‌ تاقیکردنه‌وه‌ی ده‌وڵه‌تی فیدراڵ دوباره‌ ده‌بێته‌وه‌ که‌ سه‌رکه‌وتوو نه‌بوو.

له‌ هه‌ر حاڵدا ده‌بێ چاوه‌ڕوانی رۆژانی داهاتوو بین بۆ یه‌ک لا کردنه‌وه‌ی ئه‌و پرسیارانه‌. ئه‌وه‌ش ده‌بێ بگوترێ شاره‌کانی نۆردراین وێستفالن له‌ حاڵه‌تی وه‌رشکه‌سته‌ بووندا، بۆ وێنه‌ی شارێکی وه‌ک کۆڵن زیاتر له‌ 2،5 میلیارد ئۆیرۆ قه‌رزداره‌.

ده‌سته‌ڵاتی ده‌وڵه‌تی ئێستا له‌ ده‌ست حزبی CDU (مه‌سیحی دێموکرات) و حزبی FDP ی لیبراڵ دایه‌، که‌ له‌ هه‌ڵبژاردنی پێشوو  دووای زیاتر له‌ 50 ساڵ له‌ ده‌ستی حزبی سوسیال دێموکرات SPDیان ده‌رهێنا، که‌ له‌و ساڵانه‌ی دواییدا به‌ دووقۆڵی له‌ گه‌ڵ حزبی سه‌وزه‌کان GRÜNE ده‌سته‌ڵاتیان له‌ ده‌ست دابوو. هاوکات حزبی CDU ئه‌و ده‌م توانیان پارله‌مان و پۆستی شاردارییه‌کانیش بگرنه‌ ده‌ست خۆیان که‌ ئه‌وه‌ش بۆ ئه‌یاله‌تی هه‌میشه‌ سوسیال دێموکرات سه‌یر ده‌ینوواند. سه‌رئه‌نجام ده‌سته‌ڵاتی  شاری کۆڵن دووای 9 ساڵ دیسان  که‌وته‌وه‌ ده‌ست سوسیال دێموکرات و حزبی سه‌وزه‌کان، ئایا ئه‌وه‌ سیگناڵێکه‌ بۆ گۆڕینی ده‌وڵه‌ت و پارله‌مان له‌ دۆسلدۆرف؟

 کێشه‌ و کێ به‌رکێی سوسیال دێموکرات و حزبی سه‌وزه‌کان وه‌رگرتنی دووباره‌ی ده‌سته‌ڵاتی پارله‌مان و ده‌وڵه‌ته‌. مه‌ سیحی دێموکرات و لیبراله‌کان له‌ حه‌ولی بێ وچاندان بۆ ڕاگرتنی ده‌سته‌ڵات! له‌و ساڵانه‌ی دووایدا دوو حزبی دیکه‌ دروست بوون، که‌ پێشتر نه‌بوون. یه‌کیان حزبی چه‌په‌کان LINKE، دووهه‌م حزبی لایه‌نگرانی کۆڵن Pro Köln ، که‌ ئه‌وانه‌ له‌و دووایه‌دا حزبی لایه‌نگرانی نۆردراین وێستفالنیشیان پێک هێناوه‌‌.

 حزبی چه‌په‌کان له‌ دوو هێڵی سیاسی دروست بوون، حزبی دێموکرات سوسیالیست(PDS که‌ قوورسایی سیاسی له‌ ڕۆژهه‌ڵاتی ئاڵمان بوو) و حزبی چه‌په‌کان(که‌ لێکدابڕاوه‌کانی حزبی سوسیال دێموکرات و یه‌کیه‌تیه‌کانی کرێکاری بوون). ئه‌م حزبه‌ و لایه‌نگرانی کۆڵن، هه‌ر ئێستا ئه‌ندامیان له‌ پارله‌مانی کۆڵن هه‌یه‌. حزبی Pro Köln که‌ لایه‌نی دژ به‌ بیانی له‌ سیاسه‌تیاندا ده‌بیندرێ، به‌ تووندی دژی سازکردنی مزگه‌وت له‌ شاره‌کانی ئاڵمان خۆ نیشان ده‌ده‌ن. ئه‌وان به‌ تایبه‌تی زۆر به‌ تووندی دژی سازکردنی گه‌وره‌ترین مزگه‌وت له‌ شاری کۆڵن راوه‌ستاون.  له‌ ماوه‌یه‌کی زۆر کورت دا ڕێژه‌ی ئه‌ندامانی چالاکیان گه‌یشتۆته‌ 1600 که‌س، ئێستاش به‌ ره‌سمی له‌ هه‌ڵبژاردنی ئه‌یاله‌تدا به‌شداری ده‌که‌ن.

هه‌مووی ئه‌م مه‌سه‌لانه‌ و گرفته‌کانی سیاسی، ئابوری، فێرکردن و بارهێنان و بێکاری باڵای 10% بارودوخی هه‌ڵبژاردنی بۆ دوو حزبی سه‌ره‌کی سوسیال دێموکرات و دێموکرات مه‌سیحی دژوار کردووه‌.

 نۆردراین وێستفالن گه‌وره‌ترین ئه‌یاله‌تی ئاڵمانه‌ که‌ رێژه‌ی دانیشتوانی پتر له‌ 18 ملیۆن که‌سه‌. له‌و ناوه‌دا شاری کۆڵن به‌ زیاتر له‌ یه‌ک ملیۆن دانیشتوو، گه‌وره‌ترین شاری ئه‌و ئه‌یاله‌ته‌یه‌ و ده‌وری تایبه‌ت له‌ هه‌ڵبژاردندا ده‌گێڕێ. شاره‌کانی دۆرتموند، دۆسلدۆرف، ئه‌سن، دویسبورگ هه‌ر کام به‌ رێژه‌ی دانیشتووانی نیو ملیۆنی و شاره‌کانی بوخوم، وپرتاڵ، بیله‌فێلد و بۆن هه‌ر کام به‌ سێسه‌دهه‌زار دانیشتوو و شاری مونستر که‌متر له‌و رێژه‌یه‌، ده‌وری خۆیان هه‌یه،‌ به‌ڵام هیچکام نابنه‌ کۆڵن. هه‌ر بۆیه‌ حزبه‌کانی سه‌راسه‌ری ئاڵمان له‌و رۆژانه‌دا شاری کۆڵنیان کردۆته‌ گۆڕه‌پانی گفتوگۆی سیاسی خۆیان و هه‌ر کام حه‌ولی پشتیوانی له‌ لایه‌نی خۆی ده‌داد.

له‌م به‌ینه‌دا بیانییه‌کانیش ده‌وری خۆیان له‌ هه‌ڵبژاردندا ده‌گێڕن. حزبی چه‌په‌کان زۆرترین کاندیدی بیانیان له‌ شاری کۆڵن هه‌یه‌ که‌ له‌ ترک و کورد پێک هاتوون. سوسیال دێموکراته‌کان به‌ کاندیدی ترکه‌وه‌ هاتوونه‌ مه‌یدان. سه‌وزه‌کان به‌ پێچه‌وانه‌ی پێشوو بێ کاندیدی به‌ ڕه‌چه‌ڵک بیانین، حزبه‌کانی دێموکرات مه‌سیحی و لیبرالیش بێ کاندیدی ڕه‌چه‌ڵک بیانی له‌ هه‌ڵبژاردندا به‌شداری ده‌که‌ن. ههرچه‌ند رێژه‌ی دانیشتووانی کورد له‌ ئه‌یاله‌تی نوردراین وێستفالن باڵای 150 هه‌زار که‌سه‌ به‌و حاڵه‌وه‌، که‌مترین جم و جۆڵی سیاسی له‌ ناویاندا ده‌بیندرێ.

کورسیه‌کانی پارله‌مانی ئێستای نۆردراین وێستفالن به‌م چه‌شنه‌ دابه‌ش کراون.     89CDUکورسی،   12FDP  کورسی،  74SPD کورسی، 11GRÜNEکورسی.

ART COLOGNE ئارت کۆلۆن، گرنگترین و گه‌وره‌ترین بازاری جیهانی هونه‌ر، له‌ شوێنی پیشانگاکانی کۆڵن کرایه‌وه‌. هه‌موو ساڵێک له‌ مانگی ئاوریل، هه‌زاران هونه‌رمه‌ند و سه‌دان خاوه‌ن گالێری به‌ناوبانگ، له‌ هه‌موو شوێنێکی جیهانه‌وه‌ خۆیان ده‌گه‌ێینه‌ شاری کۆڵن. ئه‌مساڵ به‌ هۆی رووداوی بورکان له‌ وڵاتی ئیسه‌له‌ند و ڕاوه‌ستانی هه‌ڵفڕینی فرۆکه‌کان له‌و رۆژانه‌دا، ده‌نگۆی ئه‌وه‌ هه‌بوو که‌ پیشانگای هونه‌ری کۆڵن به‌رپا نه‌کرێ، به‌ڵام بورکان و ڕاگرتنی فرۆکه‌کان نه‌یانتوانی پێش به‌ پێشانگای هونه‌ری کۆڵن و هاتنی هونه‌رمه‌ندان و خاوه‌ن گالێرییه‌کان بگرێ.

رۆژی سێ شه‌ممه‌ بیستی ئاوریلی 2010 کاتژمێر 17 هه‌تا 21ی شه‌و، چل و چواره‌مین پیشانگای جیهانی هونه‌ر له‌ شوێنی پیشانگاکانی کۆڵن ده‌ستی به‌کار کرد.

له‌ ڕۆژی چوارشه‌ممه‌ 21 هه‌تا 25 ی مانگی ئاوریل، 180 گالێری به‌شدار، به‌رهه‌می هونه‌رمه‌ندانی جیهان نیشان ده‌ده‌ن. پیشانگای هونه‌ر له‌ هۆڵی ژماره‌ یازه‌دی شوێنی پیشانگاکان به‌ڕێوه‌ ده‌چێ. به‌رهه‌می کلاسیک، مۆدێڕن، به‌رهه‌می دوای شه‌ڕی جیهانی و به‌رهه‌مه‌کانی نوێی سه‌ده‌ی 21 ده‌که‌ونه‌ به‌ر چاوی بینه‌ران.

پیشانگای هونه‌ری کۆڵن که‌ گه‌وره‌ترین پیشانگای نه‌ققاشی و گه‌وره‌ترین بازاری هونه‌ری جیهانه‌ له‌ ته‌ختایی جیاوازدا به‌رپا ده‌کرێ، ئه‌وه‌ش بۆ ئه‌وه‌یه‌ که‌ بینه‌ران بتوانن به‌ پێی مه‌یل و ویستی خۆیان به‌رهه‌مه‌کان سه‌یر بکه‌ن و له‌ گه‌ڵ به‌رپرسانی گالێری و ته‌نانه‌ت هونه‌رمه‌ندا قسه‌ بکه‌ن.

له‌ پیشانگای ئه‌و ساڵ وه‌ک ساڵانی پێشوو به‌رنامه‌ی جیاواز و هه‌مه‌ ڕه‌نگ به‌ڕێوه‌ ده‌چێ و تازه‌ترین ته‌کنیک و شێوه‌ی موڵتی مێدیا بۆ خوڵقاندنی به‌رهه‌می هونه‌ری به‌کار ده‌هێندرێ. به‌ تایبه‌ت له‌ ساڵانی ڕابووردوودا تیشک نه‌ک بۆ رووناکی به‌خشین، به‌ڵکو وه‌ک هونه‌رێکی وێنه‌ خوڵقێنه‌ر یان هه‌ست پێکهێنه‌ر به‌ کار ده‌هێندرێ.

هه‌ر له‌و پیشانگایه‌دا هۆده‌ی تایبه‌ت به‌ فستیواڵی جیهانی کورته‌ فیلمی کۆڵن هه‌یه‌، که‌ باشترین فیلمه‌کانی ئه‌و فستیواڵه‌ پێشکه‌ش ده‌کات، که‌ له‌ زۆر لایه‌نه‌وه‌ پێوه‌ندی به‌ هونه‌ری وێنه‌ و نه‌ققاشی به‌ شێوه‌ی نوێ هه‌یه‌.

 له‌و پیشانگایه‌دا وه‌ک 43 پیشانگای ساڵانی پیشوو تازه‌ترین ته‌کنیک و که‌ره‌سه‌کانی هونه‌ری نه‌ققاشی، په‌یکه‌رسازی، دیزاین، گرافیک و… له‌ لایه‌ن ده‌زگاکانی جیاوازه‌وه‌ نیشان ده‌درێ و ئیمکانی پرسیارکردن و گفت وگۆ بۆ هه‌موو که‌س هه‌یه‌. هێندێک له‌و گالێریانه‌ ئیمکانی فێربوون و تاقی کردنه‌وه‌ به‌ هه‌ر که‌سێک به‌تایبه‌ت منداڵان و لاوان ده‌به‌خشن. دیتنی سه‌رجه‌م پیشانگاکه‌ ئه‌سته‌مه‌ که‌ له‌ رۆژێکدا دوایی پێ بێت.

دیتنی ئه‌و پیشانگایه‌ که‌ هه‌موو ساڵێک له‌ مانگی ئاوریل دا به‌رپا ده‌کرێ، بۆ هه‌ر هونه‌رمه‌ند و هونه‌ردۆستێکی کورد ده‌توانێ پڕ سوود بێ، له‌ ساڵانی پێشوودا به‌ ناوی کورد به‌ڵگه‌ و وێنه‌ له‌و پیشانگایه‌ بیندراوه‌ و ڕه‌نگه‌ ئه‌و ساڵێش به‌رهه‌می وا ببیندرێ. زۆر که‌س به‌ تایبه‌ت بۆ دیتنی ئه‌و پیشانگایه‌ له‌ هه‌موو وڵاته‌کانی جیهانه‌وه‌، خۆیان ده‌گه‌ێینه‌ شاری کۆڵن.